img

ລາວ ໂທລະຄົມ ມອບລາງວັນ ໃຫ້ພະນັກງານຮັກສາຄວາມປອດໄພດີເດັ່ນ.

ໃນຕອນບ່າຍວັນທີ 26 ມັງກອນ 2021 ທີ່ສໍານັກງານໃຫຍ່ ລລທ ສູນກາງ ໄດ້ມີພິທີມອບລາງວັນໃຫ້ພະນັກງານຮັກສາຄວາມປອດໄພດີເດັ່ນຂື້ນ. ໃຫ້ກຽດເຂົ້າຮ່ວມໃນພິທີຄັ້ງນີ້ໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການ ໃຫຍ່ ລລທ ພ້ອມດ້ວຍຄະນະ, ມີຫົວໜ້າຝ່າຍ, ຫົວໜ້າພະແນກ, ຕາງໜ້າ ຜູ້ຈັດການ ບໍລິສັດວຽງຈັນຮັກສາຄວາມປອດໄພ ພ້ອມດ້ວຍພະນັກງານ ລລທ ຈໍານວນໜຶ່ງເຂົ້າຮ່ວມ. ຈຸດປະສົງ ຂອງການມອບລາງວັນໃນຄັ້ງນີ້ ແມ່ນເປັນການຍ້ອງຍໍບຸກຄົນດີເດັ່ນໃນການປະຕິບັດກົດລະບຽບຮັກສາຄວາມປອດໄພພາຍໃນ ລລທ ເຊັ່ນ: ລະບຽບການເຂົ້າ-ອອກ, ການປະຕິບັດ ລະບຽບມາດຕະການປ້ອງກັນການແຜ່ລະບາດຂອງເຊື້ອໄວຣັດ COVID-19, ການປະຕິບັດຫຼັກການ 5 ສ ແລະ ອຶ່ນໆ ທີ່ ລລທ ວາງອອກເຊິ່ງນອນໃນ ແຜນການພັດທະນາ ແລະ ຍ້ອງຍໍຊົມເຊີຍບຸກຄະລາກອນຜູ້ທີ່ດີເດັ່ນໃນ ການປະກອບສ່ວນເຂົ້າໃນວຽກງານຂອງບໍລິສັດຕະຫຼອດໄລຍະຜ່ານມາ ແລະ ປະຈຸບັນເພື່ອສ້າງຂະບວນການຕ້ອນຮັບ ລາວ ໂທລະຄົມ ກ້າວເຂົ້າສູ່ ປີທີ 25 ໃນວັນທີ 11.11.2021 ທີຈະມາເຖີງນີ້ໃຫ້ເປັນຂະບວນການຟົດຟື້ນ ແລະ ມີຄວາມໝາຍ.ເຊິ່ງບຸກຄົນດີເດັ່ນທີ່ໄດ້ຮັບການຍ້ອງຍໍຈາກ ລລທ ໃນຄັ້ງນີ້ໄດ້ແກ່ ທ່ານ ນາງ ຮອງ ແລະ ທ່ານ ສົມພອນ ເລືອນວົງວິຈິດ ພະນັກງານຮັກສາຄວາມປອດໄພປະຈໍາສໍານັກງານໃຫຍ່ ລລທ ໃຫ້ກຽດ ມອບລາງວັນໃນຄັ້ງນີ້ໂດຍ ທ່ານ ອາລຸນນະເດດ ບານຈິດ ຮອງຜູ້ອໍານວຍ ການໃຫຍ່ ລລທ ໃນໂອກາດດັ່ງກ່າວ ທ່ານໄດ້ກ່າວໃຫ້ຄໍາເຫັນວ່າ ການຮັກ ສາຄວາມປອດໄພພາຍໃນບໍລິສັດເປັນປັດໃຈພື້ນຖານອັນໜຶ່ງທີ່ມີຄວາມສໍາຄັນທີ່ພະນັກງານທຸກຄົນຕ້ອງພ້ອມກັນເອົາໃຈໃສ່ ແລະ ປະຕິບັດຢ່າງເຂັ້ມງວດ ເຮັດແທ້ທໍາຈິງ ເຊິ່ງກໍລະນີຕົວຢ່າງຂອງ 2 ທ່ານ ທີ່ໄດ້ຮັບລາງວັນໃນຄັ້ງນີ້ເຖີງເພິ່ນຈະບໍ່ແມ່ນພະນັກງານຂອງ ລລທ ແຕ່ຄວາມເອົາໃຈໃສ່ຂອງທັງສອງທ່ານສົມຄວນໄດ້ຮັບການຍົກຍ້ອງເພື່ອເປັນແບບຢ່າງ.

View: 233 | 2/4/2021 4:23:51 PM | ກ່ຽວກັບ ລາວ ໂທລະຄົມ

ຍ້ອນກັບ




Copyright © 2021 , All Rights Reserved | Version : 2.0